Dei fan de memmetaal: "It Frysk fielt faak al gau fertroud, it is wat eigens"

Do bist op fakânsje yn it bûtenlân en rinst ynienen Friezen tsjin it liif. Hoe is dan it kontakt mei harren? "Meastal fielt dat al gau fertroud", seit Jelske Dijkstra. Se is projektmanager fan it Mercator Europeesk Kennissintrum fan de Fryske Akademy.

Ek yn de soarch kin de Fryske taal fan betsjutting wêze, ferfolget se. "Alderen lykje har makliker iepen te stellen op it momint dat in dokter ek Frysktalich is." Net sa nuver, mient se. "It Frysk is foar in soad minsken wat eigens. Eat dêr't in soad minsken har komfortabel by fiele."